ഓണക്കേരളമേ നീ വിജയിച്ചാലും!
ഓണമഹോത്സവത്തിൽ- ഓലുന്നഭൂതിയാലേ
ഓണക്കേരളമേ, നീ വിജയിച്ചാലും!
1
ദീപാലങ്കാരങ്ങളാൽ ദീപ്തയായിതേവിധം
ദീർഘനാൾ കേരളാംബേ വിജയിച്ചാലും!
2
സാമൂഹ്യ സദ്യകളാൽ- സാമൂഹ്യസൌഹാർദ്ദത്താൽ
സാമോദം കേരളമേ വിജയിച്ചാലും!
3
കേളിയാർജിച്ച പലേ-കേളീമത്സരങ്ങളാൽ
കേരളാംബികേ നാഥേ വിജയിച്ചാലും!
4
ഘോഷയാത്രകളാലും ഘോഷിതോത്സവത്താലും
ഭൂഷിതകേരളമേ, വിജയിച്ചാലും!
5
നാടൻകലോത്സവങ്ങൾ- നാരീജനോത്സവങ്ങൾ
നാനാവിധോത്സവങ്ങൾ വിജയിക്കട്ടെ!
6
സൂരികൾകവീന്ദ്രരാൽ-സൂത്രണം ചെയ്യപ്പെട്ട
സുന്ദരകവിഗോഷ്ഠി വിജയിക്കട്ടെ!
7
ഓണക്കോടികൾ ധരി-ച്ചോമനക്കുട്ടന്മാരായ്
ഓരോകുമാരന്മാരും വിജയിക്കട്ടെ!
8
മന്ദിരാങ്കണങ്ങളും- സുന്ദരകലകളായ്
ചേർന്നുള്ള സൂനങ്ങളാൽ വിജയിക്കട്ടെ!
9
മുന്നൂറ്റിയറുപതു-മഞ്ചും ദിനങ്ങളാണ്ടിൽ
ഇന്നത്തേ സമൃദ്ധിയിൽ വിജയിക്കട്ടെ!
10
വാർദ്ധിയിൽ നിന്നുയർന്ന -വാരുറ്റകേരളമേ,
വാനവർക്കാനന്ദമേ, വിജയിച്ചാലും!
11
മാനിനികേരളാംബേ-മാനിതേ തൊഴുകൈകൾ!
ഞാനങ്ങേ നമിക്കുന്നു; വിജയിച്ചാലും!
12
(ഓണാഘോഷ കാവ്യോത്സവം, തൃശൂർ, 1961)