പരിശുദ്ധപിതാവിന്
പോൾ ആറാമൻ പോപ്പുമഹാശയനെന്റെ നമസ്ക്കാരം!
നീണാളങ്ങേ ഭരണം വരണം സത്യതിരുസ്സഭയിൽ
കാലാനുസൃത സംസ്കാരങ്ങൾ സഭയാം മാതാവിൻ
ചേലൊടു ചേർത്തിട്ടങ്ങേ ഭരണം നിതരാം വിജയിപ്പൂ.
1
അമ്മത്രേസ്യാ, ക്രതീനാ, സീയെന്നാ എന്നിവരെ
പെണ്മണിമാരെന്നുള്ള തടസ്സം വകവച്ചീടാതെ
ഡാക്ടർ ബിരുദമവർക്കും നൽകാനങ്ങുമടിച്ചില്ല
സ്വർഗ്ഗവുമങ്ങേയഭിനന്ദിച്ചാ മംഗളദിവസത്തിൽ
2
‘മാർത്തോമ്മാ വിജയിച്ചു’ വെളിച്ചം വീശിയൊരിന്ത്യയിലേ
യ്ക്കെത്തിച്ചേർന്നു ദൃഷ്ടികളിപ്പോളെന്റെ മഹാഭാഗ്യം!
സന്ന്യാസാശ്രമഭിത്തികളാലേ ചൂഴപ്പെട്ടവളാ-
മെന്നിലുമങ്ങേ പൈതൃകദൃഷ്ടികൾ വന്നു പതിച്ചല്ലോ.
3
വത്തിക്കാനിലിരിക്കിലുമങ്ങേ പാവനനേത്രങ്ങൾ-
ക്കിത്രവിദൂരക്കാഴ്ച ലഭിക്കാൻ റൂഹാവരമേകി
പാർത്തലമിതിലൊരുകരടിവൾ കേവലമെങ്കിലുമത്ഭുതമേ !
ചേർത്തുബഹുമതിയെന്നിലുമങ്ങേ പൈതൃകവാത്സല്യം.
4
ദൈവമഹത്ത്വം വർദ്ധിക്കട്ടെ! അങ്ങു പറന്നെത്തി-
ച്ചേവടികൂപ്പാനാശിക്കുന്നീ പുത്രിവിദൂരസ്ഥ
എന്നാലായതസാദ്ധ്യം ബഹുമതി വാങ്ങിയൊരിക്കൈകൾ
നന്നായ്ക്കൂപ്പി സർവ്വേശ്വരനോടേവം പ്രാർത്ഥിക്കാം.
5
‘പത്രോസിൻ സിംഹാസനമേറിയസ്സഭയെ ഭരിച്ചീടും
വത്തിക്കാൻ സമാട്ടിനു വിജയം മേന്മേൽ നൽകണമേ!
പ്രത്യേകം, സഭയിക്കാലത്തെ വിഷമപ്രശ്നങ്ങൾ
കർത്താവേ, തരണം ചെയ്യാനുമനുഗ്രഹമേകണമേ.’
6