പത്രാധിപർക്കൊരു തുറന്നകത്ത്
ആശാനാരാണെന്നെയെഴുത്തു
പഠിപ്പിക്കാനവിടെ?
മോശമിതേറ്റം; കൊല്ലക്കടകളിൽ
സൂചിവിലപ്പോകാ
“ഒരു നക്ഷത്ര”മതെന്റേതാണു
തിരുത്തിക്കരിതേയ്ക്കാ-
നൊരുവനുമില്ലവകാശ, മഹംകൃതി
മൂത്തവനതു ചെയ്തു.
ആരാണവനാ കവികുലകീട,
മതെന്തിനു ചെയ്തെന്നും
നേരേപറയണ,മതിനായ് ‘നാളം’
സ്ഥലവും നൽകിടണം.
പ്രതാധിപരേ, തെറ്റും ശരിയും
ചേർക്കുക പത്രത്തിൽ
സത്തുക്കൾക്കൊരു ചർച്ചയ്ക്കവസര-
മുണ്ടാകേണ്ടതിനായ്.
‘ഞാനതു ചെയ്തു, തെറ്റിപ്പോയെ’-
ന്നവനീപത്രികയിൽ
താനേസവിനയമേറ്റുപറഞ്ഞേ
സംഗതി ശരിയാകൂ.
അല്ലെങ്കിൽ കളി തീക്കളിയാണതു
നന്നായറിയേണം
ചൊല്ലും ചോദ്യവുമില്ലാതിങ്ങനെ
പോകാനൊക്കില്ല.
(അപ്രകാശിതം)